കൊല്ലം ഓടിക്കൊണ്ടിരുന്ന കാർ കത്തി നശിച്ചു. കാറില്‍ ഉണ്ടായിരുന്ന കുട്ടി ഉള്‍പ്പെടെയുള്ള കുടുംബം അത്ഭുതകരമായി രക്ഷപ്പെട്ടു.
എംസി റോഡില്‍ ചടയമംഗലത്ത് കഴിഞ്ഞദിവസം രാത്രി 11.45 ഓടെ ആയിരുന്നു സംഭവം.
മീയണ്ണൂർ സ്വദേശിയായ ദിനേശ് ബാബുവും സഹോദരനും കുടുംബവുമാണ് കാറില്‍ ഉണ്ടായിരുന്നത്. തിരുവനന്തപുരത്ത് നിന്ന് വരികയായിരുന്നു കാറിലുണ്ടായിരുന്നവർ. ചടയമംഗലത്ത് വച്ച്‌ കാറിന്‍റെ മുൻഭാഗത്ത് നിന്നും പുക ഉയരുന്നത് കണ്ട് കാറില്‍ ഉണ്ടായിരുന്നവർ പുറത്തിറങ്ങി.
ഉടൻതന്നെ കാറില്‍ തീ ആളിപ്പടരുകയായിരുന്നു. പരിസരത്ത് ഉണ്ടായിരുന്നവർ സമീപത്തെ പെട്രോള്‍ പമ്ബില്‍ നിന്നും ഫയർ എസ്റ്റിംഗ്വിഷർ ഉപയോഗിച്ച്‌ തീ അണയ്ക്കാൻ ശ്രമിച്ചെങ്കിലും വിജയിച്ചില്ല. തുടർന്ന് കടയ്ക്കല്‍ നിന്നുള്ള ഫയർഫോഴ്സ് സംഘം സ്ഥലത്ത് എത്തിയാണ് തീ അണച്ചത്.
വിവരം അറിഞ്ഞ് ചടയമംഗലം പോലീസും സ്ഥലത്ത് എത്തിയിരുന്നു. കാർ പൂർണമായും കത്തിനശിച്ചു.