പാലക്കാട്‌ ആനക്കരയിൽ ഓട്ടോയും ചരക്കുവാനും കൂട്ടിയിടിച്ച് നാല് പേർക്ക് പരിക്കേറ്റു. കുറ്റിപ്പുറം പേർശ്ശനൂർ സ്വദേശികളായ പ്രകാശൻ (35), സതീഷ് (36), രമേഷ് (34), റാഷിദ്‌ (30) എന്നിവർക്കാണ് പരിക്കേറ്റത്‌. വെള്ളിയാഴ്ച രാത്രി എട്ടരയോടെ ആനക്കര വടക്കത്തുപടി വളവിലായിരുന്നു അപകടം.
ആനക്കര ഭാഗത്തുനിന്നും ചേകനൂർ ഭാഗത്തേക്ക് പോകുകയായിരുന്ന ഓട്ടോയും എതിർദിശയിൽ വന്ന ചരക്കുവാനും കൂട്ടിയിടിക്കുകയായിരുന്നു. പരിക്കേറ്റ ഇവരെ എടപ്പാളിലെ സ്വകാര്യ ആശുപത്രിയിൽ പ്രവേശിപ്പിച്ചു. ഗുരുതര പരിക്കേറ്റ സതീഷിനെ പിന്നീട് തൃശ്ശൂർ മെഡിക്കൽ കോളേജിലേക്ക് മാറ്റി. പടിഞ്ഞാറങ്ങാടി കല്ലടത്തൂർ പൂരം കഴിഞ്ഞു തിരികെ പേർശ്ശനൂരിലേക്ക് പോകുമ്പോഴാണ് ഇവർ അപകടത്തിൽപ്പെട്ടത്. അപകടത്തിൽ ഓട്ടോ പൂർണമായും തകർന്നു.