കോട്ടയം: വൈക്കത്ത് സ്കൂള്‍ ബസ് ഇടിച്ചു സൈക്കിള്‍ യാത്രികനായ വയോധികൻ മരിച്ചു. ഇന്നലെ വൈകീട്ട് 5 മണിയോടെയാണ് അപകടം നടന്നത്
വൈക്കം തെക്കേനട തോട്ടുവക്കം പാണ്ടിയാംപറമ്ബില്‍ സി.കെ. വിശ്വൻ (70) ആണ് മരിച്ചത്.
വൈക്കം അമ്ബലത്തിനു സമീപത്തെ ബന്ധുവീട്ടില്‍ നിന്നും തോട്ടുവക്കത്തെ വീട്ടിലേക്ക് മടങ്ങുന്നതിനിടെ സ്കൂള്‍ ബസ് വയോധികനെ ഇടിക്കുകയായിരുന്നു. സ്കൂള്‍ ബസും സൈക്കിളും ഒരേ ദിശയില്‍ ആയിരുന്നുവെന്നു പൊലീസ് പറഞ്ഞു.
ബസ് ഇടിച്ചതോടെ റോഡിന്റെ വശത്തേക്കു മറിഞ്ഞ വിശ്വന്റെ തലയ്ക്ക് ഗുരുതര പരുക്കേറ്റിരുന്നു. ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം വൈക്കം താലൂക്ക് ആശുപത്രി മോർച്ചറിയിലേക്ക് മാറ്റി.
സംഭവത്തില്‍ ബസ് ഡ്രൈവറെ പൊലീസ് കസ്റ്റഡിയില്‍ എടുത്തു. ഇയാളെ വൈദ്യപരിശോധനയ്ക്കു വിധേയനാക്കി. കുറവിലങ്ങാട് ഡീപോള്‍ സ്കൂളിന്റ ബസാണു വയോധികനെ ഇടിച്ചതെന്നു പൊലീസ് അറിയിച്ചു. അപകടം ഉണ്ടാക്കിയ ബസും പൊലീസ് കസ്റ്റഡിയില്‍ എടുത്തിട്ടുണ്ട്.