തൃശ്ശൂർ ആമ്പല്ലൂർ: നിയന്ത്രണംവിട്ട സ്കൂട്ടർ വൈദ്യുതിത്തൂണിലിടിച്ച് വിദ്യാർഥിനി മരിച്ചു. വരന്തരപ്പിള്ളി നന്തിപുലം മാഞ്ഞൂർ കുറുവത്ത് വീട്ടിൽ സാജൻ്റെ മകൾ ഇന്ദുപ്രിയ (20) ആണ് മരിച്ചത്. അപകടത്തിൽ തലയ്ക്ക് പരിക്കേറ്റ ഇന്ദുപ്രിയയെ നാട്ടുകാർ ചേർന്ന് വേലൂപ്പാടത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കൂടെയുണ്ടായിരുന്ന സുഹൃത്തിന് നിസാര പരിക്കേറ്റതായാണ് വിവരം.
പാലപ്പിള്ളി വലിയകുളത്ത് വച്ച് ഇന്നലെ (വെള്ളി) വൈകീട്ടായിരുന്നു അപകടം. കൊച്ചി അമൃത ഇൻസ്റ്റിറ്റ്യൂട്ടിലെ റേഡിയോളജി വിഭാഗം വിദ്യാർഥിനിയാണ് ഇന്ദുപ്രിയ. സഹപാഠികളായ നാല് സുഹൃത്തുക്കൾക്കൊപ്പം ചിമ്മിനി ഡാം കാണാൻ പോയതായിരുന്നു. ഡാം കണ്ട് മടങ്ങുന്നതിനിടെ ഇന്ദുപ്രിയ ഓടിച്ച സ്കൂട്ടർ നിയന്ത്രണംവിട്ട് വൈദ്യുതിത്തൂണിൽ ഇടിക്കുകയായിരുന്നു.