തിരുവനന്തപുരം: മദ്യലഹരിയിൽ അയൽവാസിയെ യുവാവ് കഴുത്തറുത്ത് കൊലപ്പെടുത്തി. പേടികുളം ഇലങ്കത്തറയിൽ ബാബുരാജ്(64) ആണ് കൊല്ലപ്പെട്ടത്. പ്രതി സുനിൽകുമാറി(45)നെ പൊലീസ് കസ്റ്റഡിയിലെടുത്തിട്ടുണ്ട്. വെള്ളിയാഴ്ച രാത്രി ഏഴര യോടെ ബാബുരാജിൻ്റെ വീടിന് സമീപമെത്തിയ സുനിൽകുമാർ പ്രശ്‌നമുണ്ടാക്കുകയും വാക്കുതർക്കത്തിനിടയിൽ കൈവശമുണ്ടായിരുന്ന കത്തി ഉപയോഗിച്ച് ബാബുരാജിനെ വെട്ടിക്കൊലപ്പെടുത്തുകയുമായിരുന്നു. കഴുത്തിൽ ആഴത്തിൽ മുറിവേറ്റിരുന്നു. ഉടനെ നാട്ടുകാർ ചേർന്ന് മെഡിക്കൽ കോളേജ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.പ്രവാസിയായിരുന്ന സുനിൽകുമാർ തിരികെ നാട്ടിലെത്തിയതിന് ശേഷം മദ്യപിച്ച് സ്ഥിരം പ്രശ്നമുണ്ടാക്കിയിരുന്നതായി നാട്ടുകാർ പറയുന്നു. ഇഷ്ടിക തൊഴിലാളിയാണ് കൊല്ലപ്പെട്ട ബാബുരാജ്. അതേസമയം കൊലപാതകത്തിലേക്ക് നയിച്ച കാരണം വ്യക്തമല്ല. കിളിമാനൂർ പോലീസ് അന്വേഷണം ആരംഭിച്ചു