ശക്തമായ മഴയും കാറ്റും, കോഴിക്കോട് ബസിനും ട്രാവലറിനും മുകളിലേക്ക് മരം പൊട്ടി വീണു, നാശനഷ്ടം

കോഴിക്കോട്: 

ഇന്നലെ വൈകീട്ടോടെ പെയ്ത ശക്തമായ മഴയിലും കാറ്റിലും കനത്ത നാശനഷ്ടം.

കോഴിക്കോട് മുക്കം, മാവൂർ, കൂളിമാട് ഭാഗങ്ങളിൽ മരങ്ങൾ പൊട്ടിവീണാണ് പ്രധാനമായും നാശനഷ്ടങ്ങളുണ്ടായത്.

ആർഇസി-മാവൂർ റോഡിൽ വെള്ളശ്ശേരിയിലും കൂളിമാട്-മാവൂർ റോഡിൽ എളമരം കടവ്, താത്തൂർ, മുതിര പറമ്പ് എന്നിവിടങ്ങളിൽ വൈദ്യുതി തൂണുകൾ തകരുകയും ഗതാഗതം തടസ്സപ്പെടുകയും ചെയ്തു.

മുതിര പറമ്പിൽ ട്രാവലറിൻ്റെ മുകളിലും സ്വകാര്യ ബസിൻ്റെ മുകളിലും മരം കടപുഴകി വീണു. മുക്കം അഗ്നിരക്ഷാ സേന സ്ഥലത്തെത്തി മരം മുറിച്ചുമാറ്റുകയും ഗതാഗതം പുനസ്ഥാപിക്കുകയും ചെയ്തു.

സ്റ്റേഷൻ ഓഫീസർ എം അബ്‌ദുൽ ഗഫൂറിന്റെ നേതൃത്വത്തിൽ ഗ്രേഡ് അസിസ്റ്റന്റ് സ്റ്റേഷൻ ഓഫീസർ പയസ് അഗസ്റ്റിൻ, ഫയർ ഓഫീസർമാരായ പിടി ശ്രീജേഷ്, എം സുജിത്ത്, വി സലീം, എം നിസാമുദ്ദീൻ, സി വിനോദ്, ഹോം ഗാർഡുമാരായ ചാക്കോ ജോസഫ്, കെഎസ് വിജയകുമാർ എന്നിവർ പ്രവർത്തനങ്ങൾക്ക് നേതൃത്വം നൽകി.