കൊണ്ടോട്ടി മൊറയൂർ: മോങ്ങം ഹിൽടോപ്പിലെ വാടക ക്വാർട്ടേഴ്സിൽ മദ്യപിക്കുന്നതിനിടെയുണ്ടായ തർക്കത്തിനും കൈയാങ്കളിക്കുമിടയിൽ തല ഭിത്തിയിലിടിച്ച് പരിക്കേറ്റ തമിഴ്‌നാട് സ്വദേശി മരിച്ചു.
തമിഴ്‌നാട് നാഗപട്ടണത്തിനടുത്ത് മൈലാടുംതുറ സ്വദേശി ബൽറാമാണ് (45) മരിച്ചത്.
സംഭവത്തിൽ സുഹൃത്തും നാട്ടുകാരനുമായ മൈലാടുംതുറ സ്വദേശി വാസുവിനെ (43) കൊണ്ടോട്ടി പൊലീസ് അറസ്റ്റ് ചെയ്തു.
മോങ്ങത്ത് 20 വർഷമായി കൽപ്പണിക്കാരായ ബൽറാമും വാസുവും ഹിൽടോപ്പിൽ മറ്റു രണ്ട് സുഹൃത്തുക്കളുടെ വാടക ക്വാർട്ടേഴ്സിൽ തിങ്കളാഴ്ച രാവിലെയെത്തി മദ്യപിക്കുന്നതിനിടെയാണ് സംഭവം.
രാവിലെ 9.30ഓടെയുണ്ടായ തർക്കമാണ് കൊലപാതകത്തിൽ കലാശിച്ചതെന്ന് പൊലീസ് പറഞ്ഞു.
മദ്യലഹരിയിലുള്ള തർക്കത്തിനിടെ വാസു ബൽറാമിനെ പിടിച്ച് തള്ളുകയും ഭിത്തിയിൽ തലയിടിച്ച് ഗുരുതര പരിക്കേറ്റ ബൽറാം മരിക്കുകയുമായിരുന്നു.
വാസുവിനെ മോങ്ങത്തുനിന്ന് കൊണ്ടോട്ടി പൊലീസ് ഇൻസ്പെക്ടർ പി.എം. ഷമീറിൻ്റെ നേതൃത്വത്തിലുള്ള പൊലീസ് സംഘം കസ്റ്റഡിയിലെടുത്തു
ചൊവ്വാഴ്ച കോടതിയിൽ ഹാജരാക്കും. ബൽറാം അവിവാഹിതനാണ്. ചൊവ്വാഴ്ച മൃതദേഹം ബന്ധുക്കൾക്ക് വിട്ടുകൊടുക്കും.