കാസർകോട് ശാന്തിപ്പള്ളത്ത്: പന്നിക്കൂട്ടം സ്കൂട്ടറിലിടിച്ചതിനെ തുടർന്ന് വീണു പരിക്കേറ്റവരെ രക്ഷിക്കാൻ ശ്രമിക്കവേ മറ്റൊരു കാറിടിച്ച് അപകടം. നവവരനടക്കം മൂന്നു പേർക്ക് പരിക്കേറ്റു. രണ്ടുപേരുടെ നിലഗുരുതരം. സ്കൂട്ടർ യാത്രക്കാരായ കുമ്പള കുണ്ടങ്ങരടുക്ക സ്വദേശി യൂസഫ്(49), ഭാര്യ ഖദീജ(44), രക്ഷപ്പെടുത്താനെത്തിയ നവവരനും മൊഗ്രാൽ സ്വദേശിയുമായ മൻസൂർ(35) എന്നിവർക്കാണ് പരിക്ക്. ഇവരെ മംഗളൂരുവിലെ വിവിധ ആശുപത്രികളിൽ പ്രവേശിപ്പിച്ചു. മൻസൂരിനും ഖദീജയ്ക്കുമാണ് ഗുരുതര പരിക്ക്. ബുധനാഴ്‌ച രാത്രി പത്തുമണിയോടെ കുമ്പള ശാന്തിപ്പള്ളത്താണ് അപകടം. ബന്ധുവീട്ടിൽ പോയി സ്കൂട്ടറിൽ മടങ്ങിവരികയായിരുന്നു യൂസഫും ഭാര്യ ഖദീജയും. റോഡ് മുറിച്ചുകടക്കുകയായിരുന്ന പന്നിക്കൂട്ടം ഇവരുടെ സ്കൂട്ടറിൽ ഇടിക്കുകയായിരുന്നു. നിയന്ത്രണം വിട്ട സ്കൂട്ടർ മറിഞ്ഞ് ഖദീജ റോഡിലും യുസഫ് റോഡരികിലെ കുറ്റിക്കാട്ടിലും വീണു. പിന്നാലെ എത്തിയ കാറിലുള്ളവർ അപകടത്തിൽപെട്ടവരെ രക്ഷപ്പെടുത്താനായി റോഡിലിറങ്ങി. ഖദീജയെ മൻസൂർ കാറിൽ കയറ്റുന്നതിനിടെ പിറകിലൂടെ എത്തിയ മറ്റൊരു ആൾട്ടോ കാർ ഇരുവരെയും ഇടിച്ചുതെറിപ്പിക്കുകയായിരുന്നു.
ഗുരുതരമായി പരിക്കേറ്റ ഇവരുവരെയും യൂസഫിനെയും ഉടൻ തന്നെ മംഗളൂരുവിലെ ആശുപത്രികളിലെത്തിച്ചു. യൂസഫിന്റെ പരിക്ക് അത്രസാരമുള്ളതല്ല. ഒരാഴ്ച മുമ്പ് വിവാഹിതനായ മൻസൂർ വിവാഹ സൽക്കാരം കഴിഞ്ഞ് വീട്ടിലേക്ക് മടങ്ങിവരുമ്പോഴാണ് അപകടം. മൻസൂറിൻ്റെ സഹോദരനാണ് പരിക്കേറ്റവരെ ആശുപത്രിയിലെത്തിച്ചത്. കുമ്പള പൊലീസ് സംഭവത്തിൽ കേസെടുത്തു.