മൂവാറ്റുപുഴ കടാതിയില്‍ നാഷണല്‍ പെര്‍മിറ്റ് ലോറിയും ഇലക്ട്രിക് സ്‌കൂട്ടറും കൂട്ടിയിടിച്ചുണ്ടായ അപകടത്തില്‍ യുവാവിന് ദാരുണാന്ത്യം. ഇന്നലെ(തിങ്കൾ) രാത്രി 11 മണിയോടെ കടാതി നക്ഷത്ര കണ്‍വെന്‍ഷന്‍ സെന്ററിന് സമീപമുണ്ടായ അപകടത്തില്‍ കടാതി അമ്പലംപടി സ്വദേശി പാറത്തോട്ടത്തില്‍ വീട്ടിൽ വിഷ്ണു പി. സതീശന്‍ (30) ആണ് മരിച്ചത്. സ്കൂട്ടർ ഓടിച്ചിരുന്ന നെല്ലിമറ്റത്തില്‍ വീട്ടിൽ അരുണ്‍ ജോസഫിനെ (31) ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു.
കടാതിയില്‍ നിന്ന് മൂവാറ്റുപുഴയിലേക്ക് വരികയായിരുന്ന ഇരുവരും സഞ്ചരിച്ച സ്‌കൂട്ടറും എതില്‍ദിശയില്‍ വന്ന ലോറിയും തമ്മില്‍ കൂട്ടിയിടിക്കുകയായിരുന്നു. അപകടത്തില്‍ ഗുരുതരമായി പരിക്കേറ്റ വിഷ്ണുവിനെ മൂവാറ്റുപുഴ ജനറല്‍ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. പോസ്റ്റുമോർട്ടത്തിനു ശേഷം മൃതദേഹം ബന്ധുക്കൾക്ക്‌ വിട്ടുനൽകി. സംസ്കാരം ഇന്ന്(ചൊവ്വ) വൈകിട്ട് 3 മണിക്ക് മൂവാറ്റുപുഴ നഗരസഭ ശ്മശാനത്തിൽ.