നിയന്ത്രണം വിട്ട പിക്കപ്പ് ജീപ്പിടിച്ച് സൈക്കിൾ യാത്രക്കാരൻ മരിച്ചു

 

കോട്ടയം : കോട്ടയം ചങ്ങനാശേരി തൃക്കൊടിത്താനത്ത് നിയന്ത്രണം വിട്ട പിക്കപ്പ് ജീപ്പിടിച്ച് സൈക്കിൾ യാത്രക്കാരൻ മരിച്ചു. റോഡരികിൽ സൈക്കിൾ നിർത്തിയ ശേഷം കപ്പ വാങ്ങുന്നതിനിടെയായിരുന്നു അപകടം. തൃക്കൊടിത്താനം പൻപുഴ മോസ്കോ നാലുപറയിൽ മോഹനൻ ആണ് മരിച്ചത്. സംസ്കാരം ഇന്ന് ആഗസ്റ്റ് എട്ട് വ്യാഴാഴ്ച വൈകിട്ട് നാലിന് വീട്ടുവളപ്പിൽ. ഇന്നലെ ഉച്ചയ്ക്ക് രണ്ടരയോടെ തൃക്കൊടിത്താനം അയർക്കാട്ട് വയൽ

പയനിയർ സ്കൂളിന് മുന്നിലായിരുന്നു അപകടം. കുറിച്ചി ഭാഗത്തേക്ക് പോകുകയായിരുന്ന പിക്കപ്പ് ജീപ്പ് നിയന്ത്രണം നഷ്ടമായി റോഡരികിൽ നിന്ന മോഹനനെ ഇടിക്കുകയായിരുന്നു. അപകടത്തിനുശേഷം ജീപ്പ് നിർത്താതെ ഓടിച്ചു പോയി. അപകടത്തിൽപ്പെട്ട മോഹനനെ നാട്ടുകാർ ചേർന്ന് കോട്ടയം മെഡിക്കൽ കോളേജ് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. വീട്ടിൽ നിന്നും പാൽ സൊസൈറ്റിയിലേക്ക് പോയതായിരുന്നു മോഹൻ. തുടർന്ന് തൃക്കൊടിത്താനം പോലീസ് കേസെടുത്ത് അന്വേഷണം ആരംഭിച്ചു. ഇതോടെയാണ് അപകടത്തിൽപ്പെട്ട പിക്കപ്പ് ജീപ്പ് കണ്ടെത്തിയത്. തുടർന്ന് ഡ്രൈവറെ കസ്റ്റഡിയിലെടുത്തു. തൃക്കൊടിത്താനം സ്റ്റേഷൻ ഹൗസ് ഓഫീസർ ഇൻസ്പെക്ടർ എംജി അരുണിന്റെ നേതൃത്വത്തിലുള്ള സംഘമാണ് ജീപ്പ് കണ്ടെത്താൻ അന്വേഷണം നടത്തിയത്.