ഉത്തരകന്നഡ ജില്ലയിലെ ഷിരൂരില്‍ ഉണ്ടായ മണ്ണിടിച്ചിലില്‍ കുടുങ്ങിയ മലയാളി ഡ്രൈവർ അർജുനെ രക്ഷിക്കാനുള്ള ദൗത്യത്തില്‍ പ്രതീക്ഷയുടെ പ്രതീകമായി മാറിയിരിക്കുകയാണ് രഞ്ജിത്ത് ഇസ്രായേല്‍.
ദുരന്തങ്ങളില്‍ ജീവൻ രക്ഷിക്കാനായി ഓടിയെത്തുന്ന ഈ 'ദുരന്ത ഭൂമിയിലെ രക്ഷകൻ', തന്റെ അസാധാരണമായ ധൈര്യവും സേവനബോധവും കൊണ്ട് എല്ലാവരെയും വിസ്മയിപ്പിക്കുകയാണ്.
രക്ഷാപ്രവർത്തനത്തിന്റെ നേതൃത്വം ഏറ്റെടുത്ത രഞ്ജിത്തിന്റെ കരുതലും തന്ത്രവും ഈ ദുഷ്കരമായ സാഹചര്യത്തില്‍ പ്രതീക്ഷയുടെ കിരണങ്ങള്‍ നല്‍കുന്നു. തിരയല്‍ ദൗത്യം ഊർജ്ജിതമാക്കുകയും, സഹായ സംഘങ്ങളെ ഏകോപിപ്പിക്കുകയും ചെയ്യുന്നതില്‍ അദ്ദേഹം മുൻകൈയെടുക്കുന്നു.
ആരാണ് രഞ്ജിത്ത് ഇസ്രായേല്‍?
രാജ്യത്തിന്റെ വിവിധ കോണുകളില്‍ പ്രകൃതി ദുരന്തങ്ങളുണ്ടാകുമ്ബോള്‍, ആപത്ഘട്ടത്തില്‍ ജീവൻ രക്ഷിക്കാനായി ഓടിയെത്തുന്ന മലയാളി, അതാണ് രഞ്ജിത്ത് ഇസ്രായേല്‍. 'ഈ സൂപ്പർ മാൻ' സാധാരണക്കാരനാണ്. പക്ഷേ, ദുരന്തങ്ങളില്‍പ്പെട്ട് ജീവൻ അപകടത്തിലാകുമ്ബോള്‍ രക്ഷാപ്രവർത്തനത്തിനായി ഓടിയെത്തുന്ന അസാധാരണമായ മനസ്സുള്ള വ്യക്തിയാണ്.
സൈന്യത്തില്‍ ചേരാൻ ആഗ്രഹിച്ച രഞ്ജിത്ത്, പ്രായപരിധി കാരണം അവസരം നഷ്ടപ്പെട്ടു. സൈനിക സ്വപ്‌നങ്ങള്‍ തകര്‍ത്തത് 21-ാം വയസില്‍ തലച്ചോറിനെ ബാധിച്ച ഗുരുതര രോഗമായിരുന്നു. പിന്നീട് അസുഖം ഭേദമായപ്പോഴും പ്രായം അതിക്രമിച്ചു. പക്ഷേ, സേവനമെന്ന ആഗ്രഹം അദ്ദേഹത്തിന്റെ ഹൃദയത്തില്‍ ബാക്കിയായി. അങ്ങനെയാണ് ദുരന്തങ്ങളില്‍ ജീവൻ രക്ഷിക്കാനുള്ള പരിശീലനം നേടി രഞ്ജിത്ത് രംഗത്തെത്തുന്നത്.
ഉത്തരാഖണ്ഡിലെ മേഘവിസ്ഫോടനം, കേരളത്തിലെ പ്രളയം, കവളപ്പാറയിലെയും ഇടുക്കിയിലെയും ഉരുള്‍പൊട്ടല്‍, തപോവൻ തുരങ്ക ദുരന്തം ഇങ്ങനെ അനവധി ദുരന്തങ്ങളില്‍ രക്ഷാപ്രവർത്തനത്തില്‍ പങ്കെടുത്ത രഞ്ജിത്ത് ഇസ്രായേല്‍ ഏവരുടെയും മനസ്സില്‍ അഭിമാനം നിറയ്ക്കുന്ന മലയാളിയാണ്.
പ്രതിഫലം പ്രതീക്ഷിക്കാതെ, സ്വന്തം ജീവൻ പണയംവെച്ച്‌ ദുരിതത്തിലുള്ളവരെ കൈത്താങ്ങുന്ന ഈ മലയാളിയുടെ കഥ കേള്‍ക്കുമ്ബോള്‍ നമ്മുടെ മനസില്‍ അഭിമാനത്തിന്റെ പൂക്കള്‍ വിടരും.