കാസർകോട് ബേക്കല്‍: ബൈകും കാറും കൂട്ടിയിടിച്ച്‌ വിദ്യാര്‍ഥി മരിച്ചു. അപകടത്തിനിടെ പിറകില്‍ വരികയായിരുന്നു ഓടോറിക്ഷ കാറില്‍ തട്ടി നിയന്ത്രണം വിട്ട് വൈദ്യുതി തൂണില്‍ ഇടിച്ചു.
കോളിയടുക്കം ആഇശ മൻസിലില്‍ മുഹമ്മദ് അശ്റഫ് - ഫാത്വിമ ദമ്ബതികളുടെ മകൻ സി എ സര്‍ഫ്രാസുല്‍ അമാൻ (19) ആണ് മരിച്ചത്. തിങ്കളാഴ്ച ഉച്ചയ്ക്ക് 12.10 മണിയോടെ കെ എസ് ടി പി റോഡില്‍ ബേക്കല്‍ കോട്ടക്കുന്ന് രിഫാഈ മസ്ജിദിന് സമീപമാണ് അപകടമുണ്ടായത്.
കാസര്‍കോട് ഭാഗത്ത് നിന്ന് കാഞ്ഞങ്ങാട് ഭാഗത്തേക്ക് പോവുകയായിരുന്ന വിദ്യാര്‍ഥി സഞ്ചരിച്ച ബൈകും കാഞ്ഞങ്ങാട് ഭാഗത്ത് നിന്ന് വരികയായിരുന്ന കാറും കൂട്ടിയിടിച്ചാണ് അപകടമുണ്ടായത്. ഗുരുതരമായി പരുക്കേറ്റ യുവാവിനെ ഉടൻ മംഗ്ളൂറിലെ ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരണപ്പെടുകയായിരുന്നു. അപകടത്തില്‍ ഓടോറിക്ഷ ഡ്രൈവര്‍ക്ക് നിസാര പരുക്കേറ്റു.
അപകട വിവരം അറിഞ്ഞ് ബേക്കല്‍ പൊലീസ് സ്ഥലത്തെത്തി അന്വേഷണം ആരംഭിച്ചു. അപകടം വരുത്തിയ കാര്‍ കസ്റ്റഡിയിലെടുത്തു. മംഗ്ളുറു പി എ ഫസ്റ്റ് ഗ്രേഡ് കോളജിലെ രണ്ടാം വര്‍ഷ ബി കോം വിദ്യാര്‍ഥിയാണ് മരിച്ച സര്‍ഫ്രാസുല്‍ അമാൻ.