കോട്ടയം തലയോലപ്പറമ്ബ്: ബാംഗ്ലൂര്‍ സ്വദേശികളായ അയ്യപ്പൻന്മാര്‍ സഞ്ചരിച്ച കാര്‍ തലയോലപ്പറമ്ബില്‍ നിയന്ത്രണംവിട്ട് ഓട്ടോയിലും സ്‌കൂട്ടറിലും ഇടിച്ചുണ്ടായ അപകടത്തില്‍ 2 പേര്‍ക്ക് പരിക്കേറ്റു.
ഓട്ടോ ഡ്രൈവര്‍ ഇറുമ്ബയം സ്വദേശി അശ്വിൻ സാബു (23), സ്‌കൂട്ടര്‍ യാത്രികൻ വല്ലകം ചെറുമാനയില്‍ ബിബിൻ (39) എന്നിവര്‍ക്കാണ് പരിക്കേറ്റത്. ഇരുവരെയും വൈക്കം താലൂക്ക് ആശുപത്രിയില്‍ പ്രവേശിപ്പിച്ചു.
തലയോലപ്പറമ്ബ് വൈക്കം റോഡില്‍ സിംല ജംഗ്ഷനില്‍ ഇന്നലെ ഉച്ചയ്ക്ക് 2 മണിയോടെയാണ് അപകടം. ബാംഗ്ലൂരില്‍ നിന്നും ശബരിമലയ്ക്ക് പോകുകയായിരുന്ന കുട്ടികള്‍ ഉള്‍പ്പടെ ഏഴംഗ അയ്യപ്പസംഘം സഞ്ചരിച്ച കാറാണ് അപകടത്തില്‍പ്പെട്ടത്. അയ്യപ്പൻന്മാര്‍ പരിക്കേല്‍ക്കാതെ രക്ഷപ്പെട്ടു. വൈക്കം ക്ഷേത്ര ദര്‍ശനം കഴിഞ്ഞ് മടങ്ങുന്നതിനിടെ റോഡിന്റെ എതിര്‍ ദിശയിലൂടെ പോകുകയായിരുന്ന ഓട്ടോയിലും സ്‌കൂട്ടറിലും കാര്‍ ഇടിക്കുകയായിരുന്നു. കാര്‍ ഡ്രൈവര്‍ ഉറങ്ങിപ്പോയതാണ് അപകടത്തിന് കാരണമായത്. ഇടിയുടെ ആഘാതത്തില്‍ കാറിന്റെയും ഓട്ടോയുടെയും മുൻവശം പൂര്‍ണമായി തകര്‍ന്നു. തലയോലപ്പറമ്ബ് പൊലീസ് മേല്‍നടപടി സ്വീകരിച്ചു.