തൃശ്ശൂർ പട്ടിക്കാട്. കുതിരാൻ തുരങ്കത്തിന് പടിഞ്ഞാറ് ഭാഗത്ത് ഓട്ടോറിക്ഷ അപകടത്തിൽപ്പെട്ട് ഡ്രൈവർക്ക് ഗുരുതര പരിക്ക്. വടക്കുഞ്ചേരി സ്വദേശി സുരേഷ് (54) നാണ് തലയ്ക്ക് ഗുരുതരമായി പരിക്കേറ്റത്. ഇയാളെ വാണിയംപാറ 108 ആംബുലൻസിൽ തൃശൂർ അശ്വനി ആശുപത്രിയിൽ പ്രവേശിപ്പിച്ചു.
ഇന്ന് (ചൊവ്വാഴ്ച) വൈകീട്ട് ആറ് മണിയോടെ പാലക്കാട് ഭാഗത്തേക്കുള്ള പാതയിലാണ് അപകടം ഉണ്ടായത്. ഓട്ടോറിക്ഷയുടെ മുൻഭാഗത്തെ ചക്രം ഊരിപ്പോയതാണ് അപകട കാരണം. തുടർന്ന് നിയന്ത്രണം വിട്ട ഓട്ടോറിക്ഷ എതിർദിശയിൽ പോയിരുന്ന കാറിൽ ഇടിച്ചാണ് നിന്നത്. അപകടത്തെ തുടർന്ന് തുരങ്കത്തിനകത്തും വഴുക്കുംപാറ മേൽപ്പാതയിലും ഗതാഗതക്കുരുക്ക് രൂപപ്പെട്ടു. ദേശീയപതാ റിക്കവറി വിംഗ് സ്ഥലത്തെത്തി മേൽ നടപടികൾ സ്വീകരിച്ചു. തുരങ്കത്തിന് സമീപം ഗതാഗതനിയന്ത്രണം ഏർപ്പെടുത്തിയ ഭാഗത്ത് ഇന്ന് ഉണ്ടായ രണ്ടാമത്തെ അപകടമാണിത്.
