തൃശ്ശൂർ പട്ടിക്കാട്. വാണിയംപാറയിൽ അറ്റുകറ്റപണികൾ നടക്കുന്ന സ്ഥലത്ത് ബൈക്ക് അപകടത്തിൽപ്പെട്ട് ഒരാൾക്ക് പരിക്ക്. പഴയന്നൂർ സ്വദേശി ഏലിയാസ് (39) നാണ് പരിക്കേറ്റത്. ഇയാളെ വാണിയംപാറ 108 ആംബുലൻസിൽ തൃശൂരിലെ ആശുപത്രിയിൽ പ്രവേശിപ്പിച്ചു. ബുധനാഴ്ച രാത്രി 11.30 ഓടെയാണ് അപകടം ഉണ്ടായത്. റീടാറിംഗ് നടത്തുന്നതിനായി പൊളിച്ചിട്ട ഭാഗത്തുള്ള റോഡിന്റെ കട്ടിങ്ങാണ് അപകടകാരണം. ഇതിൽ കയറി നിയന്ത്രണം വിട്ട ബൈക്ക് മറിയുകയായിരുന്നു. കഴിഞ്ഞ ചില ദിവസങ്ങളായി നിരവധി ബൈക്കുകൾ പ്രദേശത്ത് അപകടത്തിൽപ്പെട്ടതായി നാട്ടുകാർ പറഞ്ഞു. അറ്റകുറ്റ പണികൾ നടക്കുന്നിടത്ത് അപകടമുന്നറിയിപ്പ് ബോർഡുകളോ ബാരിയറുകളോ സ്ഥാപിക്കാത്തതാണ് അപകട കാരണമെന്ന് നാട്ടുകാർ പറഞ്ഞു.