കൊല്ലം തഴവ: ടിപ്പര്‍ ലോറി കയറി സ്കൂട്ടര്‍ യാത്രക്കാരി യുവതി ദാരുണമായി മരിച്ചു. തഴവ ഗ്രാമ പഞ്ചായത്ത് അംഗം ആര്‍.സുജയുടെയും കുതിരപ്പന്തി കളത്തില്‍ വടക്കതില്‍ ജഗദീഷിന്റെയും മകള്‍ നിള ജഗദീഷാണ് (25) മരിച്ചത്
ഇന്നലെ വൈകിട്ട് 5 ന് തൊടിയൂര്‍ വേങ്ങറ ചേലക്കോട്ടുകുളങ്ങര ഗവ. എല്‍.പി സ്കൂള്‍ ജംഗ്ഷനിലായിരുന്നു അപകടം. പിന്നില്‍ നിന്ന് വരികയായിരുന്ന ടിപ്പര്‍ ലോറി നിള ഓടിച്ചിരുന്ന സ്കൂട്ടറിന്റെ ഹാൻഡിലില്‍ ഇടിച്ചു. നിയന്ത്രണം നഷ്ടമായതോടെ റോഡില്‍ വീണ നിളയുടെ ശരീരത്തിലൂടെ ലോറിയുടെ പിൻചക്രം കയറിയിറങ്ങി തത്ക്ഷണം മരിക്കുകയായിരുന്നു.
കുലശേഖരപുരം പുതിയകാവില്‍ ഒരു സ്വകാര്യ ധനകാര്യ സ്ഥാപനത്തില്‍ കളക്ഷൻ ഏജന്റായി ജോലി നോക്കി വരികയായിരുന്നു നിള. കളക്ഷനുകള്‍ സ്വീകരിച്ച ശേഷം പണം അടയ്ക്കാനായി സ്ഥാപനത്തിലേക്ക് പോകാൻ ചക്കുവള്ളി ഭാഗത്ത് നിന്ന് പുതിയകാവിലേക്ക് പോകുന്നതിനിടെയായിരുന്നു അപകടം. ഭരത് ജഗദീഷ് സഹോദരൻ.