ഇടുക്കി തൊടുപുഴ: തടി കയറ്റിവന്ന പിക്ക്-അപ് ജീപ്പ് മറിഞ്ഞ് ഡ്രൈവര്‍ക്ക് ഗുരുതര പരിക്ക്. മണക്കാട് ഇരവിപ്പാറ കരുവേലില്‍ സജിക്കാണ് (52) പരിക്കേറ്റത്.
വഴിത്തല-പുറപ്പുഴ റോഡില്‍ ബാപ്പുജി സ്കൂളിനു സമീപം ഇന്നലെ വൈകുന്നേരം 6.45 ഓടെയായിരുന്നു അപകടം.
ചെറിയ റോഡിലൂടെ തടി കയറ്റിവന്ന പിക്ക്-അപ് ജീപ്പ് പിന്നിലേക്ക് എടുത്തപ്പോള്‍ റോഡിന്‍റെ സൈഡ് ഇടിയുകയും നിയന്ത്രണം നഷ്ടപ്പെട്ട് ഒരുവശത്തേയ്ക്ക് മറിയുകയുമായിരുന്നു. വാഹനം റോഡരികിലെ തേക്ക് മരത്തില്‍ ഇടിച്ചാണുനിന്നത്. സീറ്റിനടിയില്‍ കുടുങ്ങിയ സജിയെ തൊടുപുഴയില്‍ നിന്നെത്തിയ ഫയര്‍ഫോഴ്സ് ഉദ്യോഗസ്ഥരും നാട്ടുകാരും ചേര്‍ന്നാണ് ഏറെ ശ്രമകരമായി പുറത്തെടുത്തത്.
തുടര്‍ന്ന് ഫയര്‍ഫോഴ്സ് ആംബുലൻസില്‍ തൊടുപുഴയിലെ സ്വകാര്യ ആശുപത്രിയില്‍ എത്തിച്ചു. ഇവിടെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുകയാണ്.
അസിസ്റ്റന്‍റ് സ്റ്റേഷൻ ഓഫീസര്‍ പി.ഇ. അലിയാര്‍, ബിബിൻ തങ്കപ്പൻ, പി.എസ്. എബി, അജയകുമാര്‍ എന്നിവര്‍ രക്ഷാപ്രവര്‍ത്തനത്തിനു നേതൃത്വം നല്‍കി. കരിങ്കുന്നം പോലീസും സ്ഥലത്ത് എത്തിയിരുന്നു.