കോഴിക്കോട്: സ്വകാര്യ ബസ് ഇടിച്ച് സ്കൂട്ടർ യാത്രികരായ രണ്ടുപേർക്ക് പരിക്ക്. കോഴിക്കോട് വടകരയിൽ ദേശീയപാതയിലാണ് അപകടമുണ്ടായത്. സ്കൂട്ടർ യാത്രികരായ കണ്ണൂക്കര സ്വദേശി സുനീർ, സഹോദരി സുനീറ എന്നിവർക്കാണ് പരിക്കേറ്റത്. ഇന്ന് ഉച്ചക്ക് 2 മണിയോടെയാണ് സംഭവം നടന്നത്. ദേശീയ പാതയിൽ പാർക്കോ ആശുപതിക്ക് സമീപമാണ് അപകടമുണ്ടായത്. കണ്ണൂരിൽ നിന്നും കോഴിക്കോടേക്ക് പോകുകയായിരുന്ന സ്വകാര്യ ബസ് സ്കൂട്ടറിനെ ഇടിച്ചതോടെ രണ്ട് പേരും റോഡിലേക്ക് തെറിച്ച് വീഴുകയായിരുന്നു.
ഇടിച്ചശേഷം സ്കൂട്ടർ ബസിനുള്ളിൽ കുരുങ്ങി. തുടർന്ന് സ്കൂട്ടറുമായി ബസ് 20 മീറ്ററോളം മുന്നോട്ട് നീങ്ങി. ഇതിനുശേഷമാണ് ബസ് നിർത്തിയത്. അപകടം നടന്നയുടനെ ഇരുവരും തെറിച്ചുപോയതിനാലാണ് വൻദുരന്തമൊഴിവായത്. റോഡിലേക്ക് തെറിച്ചുവീണപ്പോൾ മറ്റു വാഹനങ്ങൾ ഇല്ലാതിരുന്നതും അപകടമൊഴിവാക്കി. വീഴ്ചയിൽ പരിക്കേറ്റ ഇരുവരെയും സ്വകാര്യ ആശുപത്രിയിൽ പ്രവേശിപ്പിച്ചു.കോഴിക്കോട്- കണ്ണൂർ റൂട്ടിലോടുന്ന ഗീത എന്ന പേരിലുള്ള സ്വകാര്യ ബസാണ് സ്കൂട്ടറിലിടിച്ചത്.