എറണാകുളം മൂവാറ്റുപുഴ: നിയന്ത്രണം നഷ്ടപ്പെട്ട കാർ ടെമ്പോ ട്രാവലറിലിടിച്ച് അപകടം. മൂവാറ്റുപുഴ കൂത്താട്ടുകുളം എംസി റോഡിൽ ഉന്നക്കുപ്പ വളവിന് സമീപം ഇന്ന് രാവിലെ 11 ഓടെ കോട്ടയം സ്വദേശികൾ സഞ്ചരിച്ച കാറാണ് അപകടത്തിൽപെട്ടത്. അപകടത്തിൽ കാറിലുണ്ടായിരുന്ന സ്ത്രീയ്ക്കും, ട്രാവലറിലെ യാത്രക്കാർക്കും പരിക്കേറ്റു. നെടുമ്പാശ്ശേരി എയർപോർട്ടിൽ നിന്നും കോട്ടയം ഭാഗത്തേയ്ക്ക് പോവുകയായിരുന്ന കാർ നിയന്ത്രണം നഷ്ടപ്പെട്ട് എതിൽ ദിശയിൽ വന്ന ട്രാവലറിൽ ഇടിയ്ക്കുകയായിരുന്നു. കുളത്തുപ്രയാർ കടപ്ലാക്കുടിയിൽ വർഗ്ഗീസ് കെ.ജെയും, ഭാര്യയും, ഡ്രൈവറുമാണ് അപകടത്തിൽപെട്ട കാറിലുണ്ടായിരുന്നത്. അപകടത്തിൽ സാരമായി പരിക്കേറ്റ കാർ യാത്രികയെ മൂവാറ്റുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. ട്രാവലറിലുണ്ടായിരുന്ന ഏഴോളം യാത്രക്കാർക്കും അപകടത്തിൽ പരിക്കേറ്റു. ഇടിയുടെ ആഘാതത്തിൽ കാറും, ട്രാവലറും ഭാഗികമായി തകർന്നു.