മലപ്പുറം ചങ്ങരംകുളം പന്താവൂരിൽ നിയന്ത്രണം വിട്ട കാർ മറിഞ്ഞ് 2 പേർക്ക് പരിക്ക്. കുറ്റിപ്പുറം - തൃശൂർ സംസ്ഥാന പാതയിൽ പന്താവൂരിലാണ് അപകടം നടന്നത്. അമിത വേഗതയിൽ എടപ്പാൾ ഭാഗത്ത് നിന്ന് വന്ന മാരുതി ബ്രസ്സ കാർ നിർത്തിയിട്ടിരുന്ന ഒരു ബൈക്കിലും ഒരു സ്‌കൂട്ടറിലും ഇടിച്ച ശേഷം സ്കൂൾ ബസ്സിലും ഇടിച്ചു മറിയുകയായിരുന്നു.*
ഇന്ന് ഉച്ചക്ക് ശേഷമാണ് അപകടം. കാഞ്ഞിരത്താണി സ്വദേശി വാകയിൽ വീട്ടിൽ ജുസ്സുറാൻ (25) ഓടിച്ച കാറാണ് അപകടത്തിൽപ്പെട്ടത്. സംഭവത്തിൽ റോഡരികിൽ നിൽക്കുകയായിരുന്ന എടപ്പാൾ കാളാച്ചാൽ സ്വദേശി മുണ്ടെങ്ങൽ റഫീഖ് എന്നയാൾക്കും പരിക്കേറ്റു.
റോഡരികിലെ സർവേക്കല്ല് ഇടിച്ച് തെറിപ്പിച്ചാണ് ബൈക്കിലും സ്‌കൂട്ടറിലും ഇടിച്ചത്. അപകടത്തിൽ ഈ രണ്ട് വാഹനങ്ങളും കാറും പൂർണമായും തകർന്നു. സ്കൂൾ ബസിന്റെ മുൻവശവും തകർന്നിട്ടുണ്ട്. ഡ്രൈവർ അത്ഭുതകരയാണ് രക്ഷപ്പെട്ടത്. പരിക്കേറ്റവരെ ചങ്ങരംകുളം സ്വകാര്യ ആശുപത്രിയിൽ പ്രവേശിപ്പിച്ചു.