കാസർകോട് പുത്തൂര്‍: ഇരുചക്രവാഹനം ഇടിച്ചതിനെ തുടര്‍ന്ന് ഓട്ടോറിക്ഷ നിയന്ത്രണം വിട്ട് മറിഞ്ഞ് ഒമ്പത് സ്‌കൂള്‍ വിദ്യാര്‍ഥികള്‍ക്ക് പരിക്കേറ്റു. ബെല്‍ത്തങ്ങാടി താലൂക്കിലെ മൂരുഗോളിയില്‍ തിങ്കളാഴ്ച്ച വൈകിട്ടാണ് അപകടമുണ്ടായത്. കല്ലേരിയില്‍ നിന്ന് മൂടഡുക്കയിലെ സ്വകാര്യ ഇംഗ്ലീഷ് മീഡിയം സ്‌കൂളിലെ ഒമ്പത് വിദ്യാര്‍ത്ഥികളുമായി പോവുകയായിരുന്ന ഓട്ടോറിക്ഷയില്‍ എതിരെ വന്ന ഇരുചക്രവാഹനം ഇടിക്കുകയായിരുന്നു. ഓട്ടോറിക്ഷാ ഡ്രൈവര്‍ പെട്ടെന്ന് ബ്രേക്ക് ചവിട്ടിയതോടെ വാഹനം മറിഞ്ഞു. പരിക്കേറ്റ കുട്ടികളെ ഉപ്പിനങ്ങാടിയിലെ കമ്മ്യൂണിറ്റി ഹോസ്പിറ്റലില്‍ പ്രവേശിപ്പിച്ചു.