ചെന്നൈയില്‍ നാലാം ക്‌ളാസുകാരിക്ക് നേരെ പശുവിന്റെ ക്രൂരമായ ആക്രമണം. കുട്ടിയെ കൊമ്ബില്‍ ചുഴറ്റിയെറിയുകയും നിലത്തിട്ട് ചവിട്ടുകയും ചെയ്തു.ഗുരുതരമായി പരിക്കേറ്റ കുട്ടിയെ ആശുപത്രിയില്‍ പ്രവേശിപ്പിച്ചിരിക്കുകയാണ്
ചെന്നൈ എംഎംഡിഎ കോളനിയിലായിരുന്നു ആളുകളെ നടുക്കിയ സംഭവം. സ്‌കൂള്‍ വിട്ടുവരികയായിരുന്നു കുട്ടി. സമീപത്തുകൂടി പശു നടന്നുപോകുന്നുമുണ്ടായിരുന്നു. പെട്ടെന്ന് കുട്ടിക്ക് നേരെ തിരിഞ്ഞ പശു കുട്ടിയെ കൊമ്ബില്‍ ചുഴറ്റിയെറിഞ്ഞു. തുടര്‍ന്ന് നിലത്തുവീണ കുട്ടിയെ ചവിട്ടി. സമീപത്തുണ്ടായിരുന്ന കുട്ടിയുടെ അമ്മയും പശുവിന്റെ ഉടമയുമെല്ലാം പശുവിനെ പിന്തിരിപ്പിക്കാൻ ശ്രമിച്ചെങ്കിലും ഉടൻ ഫലം കണ്ടില്ല. തുടര്‍ന്ന് ഒരുമിനുറ്റോളം കുട്ടിയെ ആക്രമിച്ച പശുവിനെ കല്ലെറിഞ്ഞാണ് ആളുകള്‍ പിന്തിരിപ്പിച്ചത്.
സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്. ഗുരുതരമായി പരിക്കേറ്റ കുട്ടിയെ ആശുപത്രിയില്‍ പ്രവേശിപ്പിച്ചിരിക്കുകയാണ്. സംഭവത്തില്‍ പശുവിനെ അലക്ഷ്യമായി അഴിച്ചുവിട്ടതിന് ഉടമയ്ക്കുമേലെ പൊലീസ് കേസെടുത്തിട്ടുണ്ട്.