പട്ടിക്കാട്. ദേശീയപാതയിൽ പട്ടിക്കാട് മേൽപാതയ്ക്ക് മുകളിൽ ഉണ്ടായ അപകടത്തിൽ ബൈക്ക് യാത്രികനായ ഇരിങ്ങാലക്കുട സ്വദേശി ഷെബീർ (38) ന് ഗുരുതരമായി പരിക്കേറ്റു. ഇന്ന് വൈകീട്ട് നാലരയോടെ തൃശ്ശൂരിൽ നിന്ന് പാലക്കാട് ഭാഗത്തേക്കുള്ള പാതയിലാണ് അപകടമുണ്ടായത്. ഒറ്റപ്പാലത്തുള്ള ഭാര്യവീട്ടിലേയ്ക്ക് പോകുന്ന വഴിയാണ് അപകടം. ബൈക്കിനു പിന്നിലൂടെ വന്ന വാഹനം തട്ടിയതാണെന്ന് കരുതുന്നു. നിയന്ത്രണം വിട്ട ബൈക്കിൽ നിന്ന് തെറിച്ചു വീണ ഷെബീർ റോഡിലൂടെ അമ്പത് മീറ്ററോളം നിരങ്ങി നീങ്ങിയാണ് നിന്നത്. ഹൈവേയിൽ ശുചീകരണ പ്രവർത്തനത്തിൽ ഏർപ്പെട്ടിരുന്ന സ്ത്രീ തൊഴിലാളിയാണ് അപകടത്തിൽ പെട്ടയാളെ കണ്ടത്. ഉടനെ ഹൈവേ റിക്കവറി വിഭാഗത്തെ വിവരമറിയിക്കുകയും ആംബുലൻസിൽ തൃശ്ശൂരിലെ സ്വകാര്യ ആശുപത്രിയിൽ എത്തിക്കുകയുമായിരുന്നു. യുവാവ് ശരീരമാസകലം മുറിവേറ്റ നിലയിലായിരുന്നു എന്ന് ദൃക്സാക്ഷികൾ പറഞ്ഞു.
